AF222a: 77v

bāb bu bābda yüzde olan ʿilletlerüñ tedbīri beyānındadur cümleden biri yüz ve eller // yarılur bu maraż yā güneşden veyā yėlden veyā ṣoʾuqdan veyā ṣoʾuq ṣuʾ‑ile āb‑dest ėtmekden // olur anuñ ʿilācı yüz yaġıdurki yüzi yumuşadur ṣanʿatı budur ki keçinüñ yürek // yaġını alub bir ṭaş icinde ṣoʾuq ṣu‑yile bir qac kerre yuyasın tā ṣoʾuq olınca // ṣoñra elli dirhem yaġa on beş dirhem gül ṣuyı birle isfīdāc qatasın andan // günlük ve maṣṭakī beş dirhem ve ḥaṣalband [?] on dirhem ve misk iki çekirdek qoyub tekrār ezesin // tā bu eczā muḥirrā olınca daḫı qalaylı qaba on dirhem kāfūrī bal mūmı ve yigirmi beş dirhem şīrevġan // qatub qaynadasın tā köpük olınça çalqayasın ġāyet maqbūldür dīger yüzde olan ʿilletüñ daḫı biri // çıġıtdur eger dārçīni saḥq ėdüb bala qarışdura daḫı yüze dürte giderür dīger acı bādem // yaġı çıġıdı giderür bir qaç kerre ėdeler ġaflet olınmaya dīger çıġıdı olan yüze penīr ṣuyını // bir qac kerre sürseler giderür dīger zaʿferān‑ile nişāsteʾi ezüb yüze sürseler çıġıdı giderür // dīger yüzde kim saʿfa [!] ola yaʿnī ufacuq başçuġuzlar belüre ʿilācı budur ki qīfāl ṭamarından qan // alalar andan qulaq ardındaġı ṭamardan ve başın [!] baʿżı āşikāre ṭamarlarından ve ʿırqu l‑enfden qan alub // eñseden ḥicāmet ėtmek gerekdür ṣoñra müshil vėrüb perḥīz [!] ėdesin bi‑iẕni llāhi defʿ ola dīger // bir daḫı bādişnāmdur bu yābis ṭuzlu balġamdan olur veyā balġamla qanuñ ruṭūbetinden olur aña daḫı // aña daḫı ol beyān ėtdigüm ʿilācla tedbīr ėdesin daḫı ammā bu mücerrebdür kim görilmişdür bir pāre bezi ḥayż // qanına bulaşdurup qurudasın daḫı rengi taġyīr ėdüb vėresin üç gėce yüzine niqāb ėdüb // baġlaya mücerrebdür dīger ammā ṣac ve ṣaqal ve qaş kirpik dökülmek ol qılları ṣuvaran ruṣūbete fesād // ėrişür ol sebebden qıllar dökilür nite kim şūra yėrde ot bitmez ammā bu rence dāʾü s̱‑s̱aʿleb dėrler // dėrler ve illā ruṭūbetinüñ fesādı d(ev)āʾü l‑ḥayyede ziyāde olur bu iki derdüñ mā‑beyninde farq // budur kim dāʾü s̱‑s̱aʿlebde qıllar dökilür ammā dāʾü l‑ḥayyede dėri böylece qopar imdi bu ʿillete // olan mübtelā pīre naẓm ėdüb aña göre ʿilāc olına ve illā müshilāt bābında yazaruz // ḥabb‑i zībeqden ġaflet olınmaya ve maʿcūn yüzi [?] ġāyet nāfiʿdür dīger bir kişinüñ ṣaçından //